AF268: 62v

qaṣīde‑i ʿAlī Dede el‑Ḥarīmī türbe‑dār‑i merḥūm u maġfūrla Sulṭān Süleymān Ḫān der‑Sigetvār

remel: fāʿilātün ‑ fāʿilātün ‑ fāʿilātün ‑ fāʿilün

1 Tīġini mirrīḫ alub qıldı yine cevlān‑i çarḫ
Ṭop yėrine dem‑be‑dem baş oynada çevgān‑i çarḫ

Reʾsü l‑qadr‑i zühre çalub çeng‑i ḥarbīsin yine
Geldi qana boyadı sancaġını keyvān‑i çarḫ

Müşterīdür müşterī devrinde cānlar almaġa
Ḫayme‑i ʿadlüñ ṭınābı durdı bu ḥāqān‑i çarḫ

Ḫalqa bu heybetle cilve eyledi necm‑i zuḫal
Baş‑ile başdan başa zeyn eyledi meydān‑i çarḫ

5 Destine aldı ʿuṭārid nīze‑i kilkin şehā
Mīm ve dālüñ şevqine olsun ʿaceb raqṣān‑i çarḫ

Mīm‑i evvel mīm‑i s̱ā [...]ine dek mesmūm ola
Atla qavs‑i qūzaḫdan ʿāleme bīgān‑i çarḫ

ʿĀr u nāmūs ʿaceb terk eyledi Etrāk heb
Qurdı qavsi gizledi tīrin yine der‑bān‑i çarḫ

Sikke‑i devlet oqınmaz oldı qalb oldı dāfiʿ
Ḫānedān‑i ʿadli ḫayfā eyledi vīrān‑i çarḫ

Resm‑i rāsimi qıldı ʿadlüñ bu meh dökdi ḫuṭbeler
Qandadur necm‑i hidāyet ola‑mı raḫşān‑i çarḫ

10 Aldı bu devr‑i zemāne bu ʿanāṣırdan murād
Cāmesin qalbüñ qalb eyledi bu ġuṣṣadan sulṭan‑i çarḫ

Her yañadan fitne‑i āḫir‑zemān oldı ṣadā
Bozdı bu dūlāb‑i ʿadli ẓulmle devrān‑i çarḫ

Resmi qıldı devletüñ ḥālī ḫāyāli ḥāliyā
ʿArṣa‑i iḫrāba yaydı ḫaymesin fürsān‑i çarḫ

Ḥātem‑i ʿAbbāsiyān oldı ḫılāfet devrinüñ
Ḫidmete ʿOs̱māniyān oldı gelüb aʿyān‑i çarḫ

Mīmi mīmüñ mīmine maẓhar olan serverini
Yolına ṣad ḫānedānın eylesün qurbān‑i çarḫ

15 Reʾs ü l‑qadr bu qırānuñ resm‑i ismidür şehā
Her [...] v – ‑ fehm qıl erler olur aqrān‑i çarḫ

Ṣūretā derdā dirīġā kār‑dān‑i ġāziyān
Gitdi göçdi cümleten bu ʿarṣadan aʿyān‑i çarḫ

İki nūnuñ arasında istiqāmet resmi bes
Bozdı uc merkezle şimdi anı bir destān‑i çarḫ

Yüzine şems ü qamer çeksün niqābın dem‑be‑dem
Revnaq‑i şerʿi yitürdi aġlasun her ān çarḫ

Mīm‑i evvel mīm‑i s̱ānī ile qılsa iqtirān
Ḥırqadan baş qaldurur her yañadan aʿyān‑i çarḫ

20 ʿĀleme‿elifüñ qırāʾet gösterür erden nişān
Reʿs ü l‑qadr bu qırān olmış şehā burhān‑i çarḫ

Menzile ėrdi zeffde bir cennetdür şems‑i münīr
Lemʿa‑i necm‑i ʿadāletle olur tābān‑i çarḫ

Reʾy‑i mīmüñ menzilinde ṭāliʿi mesʿūd ola
Bir ṣadef‑i mīminde qılmışdur anı pinhān‑i çarḫ

Vāqıf‑i gence qadar taḥmīn‑i iʿdādī degül
Ber‑kāmilden oqur ḥum‑ḥānede rindān‑i çarḫ

Bu muʿammāyı cefr‑i cām‑i Cemüñ naqşındadur
Ey Ḥarīmī bezm‑i ʿışquñ sırrıdur ʿirfān‑i çarḫ